दाङ । दाङको तुलसीपुरमा ३४ किलोमिटर लामो चक्रपथ निर्माण हुने भएको छ । नगरपालिकाको ११ वडामध्ये १० वटा वडालाई जोड्ने गरी चक्रपथ निर्माण हुने भएको हो ।
उक्त चक्रपथ निर्माण गर्नका लागि नगरपालिकाले रु. ३७ करोड बजेट लाग्ने प्रारम्भिक अनुमान गरेको  नगरपालिकाका कार्यकारी अधिकृत भरतकुमार शर्माले जानकारी दिनुभएको छ ।
अधिकृत शर्माका अनुसार चक्रपथ निर्माणका लागि ग्रामीण पूर्वधार विकास कन्सल्टेन्सी काठमाडौँले जिम्मा पाइसकेको र निर्माण कार्यको सम्भाव्यता अध्ययनकार्य समेत गरिसकेको बताइएको छ ।
शर्माका अनुसार कन्सल्टेन्सीले तीन महिनादेखि गरेको अध्ययनले नगरपालिकाको  वडा नं ७ बाहेक अरू सबै वडालाई  जोड्ने जनाइएको छ ।
भौगोलिक विकटताका कारण ७ नम्बर वडालाई चक्रपथले जोड्न नसकिने  जानकारी दिँदै शर्माले सो वडालाई पर्यटकीयरुपमा विकास गर्ने योजना बनाइएको बताउनुभयो ।
हाल सो वडामा कृषि सडक निर्माणकार्य सम्पन्न भइसकेको छ । कन्सल्टेन्सीले तयार पारेको अध्ययनका अनुसार  चक्रपथ वडा नं. ४ को राजापुरबाट  सुरु हुनेछ । जसअनुसार वडा नं-३ को राप्ती शान्ति उद्यान, वडा नं.-२ को  राप्ती आँखा अस्पताल, वडा नं-१ को शिरकुलो हुँदै वडा नं-१० को डाँडाखुरी भएर वडा नं-११ हुँदै वडा नं-६ को गोलौरा र वडा नं-५ को तुलसीपुर हुँदै पुनः सोही ठाउँमा जोडिने छ ।
चक्रपथ निर्माणसँगै ठाउँठाउँमा कजवेसमेत निर्माण गरिने जनाइएको छ । चक्रपथ निर्माण भएपछि वडालाई सडकले जोड्ने र उत्पादित कृषि उपजलाई बजारमा ल्याउन सजिलो हुने नगरपालिकाले जनाएको छ ।
यसैबीच तुलसीपुर नगरपालिकाले चक्रपथ निर्माणकार्यबारे सोमबार एक कार्यक्रमको आयोजना गरी जानकारी गराएको छ ।
सो अवसरमा उपस्थित सहभागीले  नगरपालिकाले सबै वडालाई छुने गरी दीर्घकालीन सोच राखेर  निर्माणकार्य अघि बढाउनुपर्ने सुझाव दिएका थिए ।